धनगढीकी एक आमा १२ बर्षदेखि माइलो छोराको पर्खाईमा

समाचार

गृहपृष्ठ
समाचार
धनगढीकी एक आमा १२ बर्षदेखि माइलो छोराको पर्खाईमा

धनगढीकी एक आमा १२ बर्षदेखि माइलो छोराको पर्खाईमा

बिहीबार, जेठ २१, २०८३ कञ्चन खवर

२१ जेठ, काठमाण्डौ
धनगढीकी गोमा बराल विगत १२ वर्षदेखि आफ्नो माइलो छोरो डम्बर बरालको प्रतीक्षामा आँसु बगाइरहेकी छिन् । ०७१ सालमा कामको खोजीमा भारतको पञ्जाब गएका डम्बर एक वर्षसम्म सम्पर्कमा रहे पनि त्यसयता परिवारको सम्पर्क बाहिर रहेका छन् ।
छोराको अत्तोपत्तो नभएपछि विक्षिप्त बनेकी आमा गोमाले हालै सञ्चारकर्मी अर्जुन भुसालको सम्पर्कमा आई आफ्नो छोरा खोजिदिन हारगुहार गरेकी छिन् ।
"जहाँ भए पनि आइज छोरा, मलाई हेर्न मन छ" आफ्नो छोराको फोटो हातमा लिएर भक्कानिँदै गोमाले भनिन्, "जसरी जहाँ छस् भने पनि आइज, मलाई हेर्न मन छ । सम्पर्कमा आइदिए हुन्थ्यो, जहाँ भए पनि" ।
हराइरहेका डम्बरलाई नागरिकतामा डम्बर बराल भनिए पनि भारतमा 'दीपक बराल' नामले चिनिने गरेको उनले बताइन् ।
जेठको २२ गतेतिर पञ्जाब गएका डम्बरले सुरुमा पाल्पा जान्छु भनेका थिए ।तर आमाले बर्खाको समयमा पाल्पा नजा भनेर रोकेकी थिइन् । पछि उनी पञ्जाब पुगेर कुक (भान्से) को काम गर्न थालेका थिए । एक वर्षपछि उनले आफ्ना साथीलाई आफू 'जालन्धर' जान लागेको बताएका थिए, तर त्यसपछि उनी कसैको पनि सम्पर्कमा आएनन् ।
परिवारमा बज्रपात
बराल परिवारले एउटा छोरालाई पहिले नै गुमाइसकेको छ । गोमाका जेठा छोरा सुभाष बरालको मृत्यु भइसकेको छ भने कान्छा छोरा प्रकाश बराल घरमै छन् । एउटा छोराको मृत्यु र अर्को १२ वर्षदेखि बेपत्ता हुँदा परिवार ठूलो पीडामा छ ।
सञ्चारकर्मी भुसालले डम्बर (दीपक) लाई जहाँ भए पनि आफ्नो परिवारको सम्पर्कमा आउन आग्रह गरेका छन् । उनले भनेका छन्, "आज ठुलो दाइ हुनुहुन्न, भाइ र आमा परिवारको पीडामा हुनुहुन्छ । दुई-दुई जना सन्तानको अत्तोपत्तो नहुँदा आमाको अवस्था कस्तो होला ? कृपया जहाँ भए पनि घर सम्झेर आइदिनुस्" ।
यदि कसैले डम्बर बराल (दीपक) को बारेमा केही जानकारी पाएमा 9801564807/ 9801564808 मा सम्पर्क गरिदिन समेत अपिल गरिएको छ ।

प्रकाशित मिति: बिहीबार, जेठ २१, २०८३ ०६:०९