रुपन्देहीमा भन्सार छलीका १० लाख ९९ हजार बढीका सामान बरामद

समाचार

गृहपृष्ठ
समाचार
रुपन्देहीमा भन्सार छलीका १० लाख ९९ हजार बढीका सामान बरामद

रुपन्देहीमा भन्सार छलीका १० लाख ९९ हजार बढीका सामान बरामद

शनिबार, असोज ३, २०८३ कञ्चन खवर

३ असोज, रुपन्देही
जिल्ला प्रहरी कार्यालय रुपन्देहीले जिल्लाका विभिन्न स्थानबाट भन्सार छली तथा चोरी पैठारी गरी ल्याइएका करिब १० लाख ९९ हजार ६८५ रुपैयाँ बराबरका सामान बरामद गरेको छ।
प्रहरीका अनुसार २०८३ असोज ३ गते जिल्लाका विभिन्न स्थानमा गरिएको चेकजाँचका क्रममा अवैध रूपमा भन्सार छली गरी ल्याइएका विभिन्न सामान तथा सवारीसाधन बरामद गरिएको हो।
प्रहरीले रोहिणी गाउँपालिका–१ हनुमानगढीबाट ३५ हजार ७५० रुपैयाँ बराबरका विभिन्न तरकारी, २० किलो स्याउ, २० किलो मुसम्मी, १० किलो सुकेको खुर्सानी, ५ किलो छोला र १० थान लेडिज सुट बरामद गरेको छ।
त्यस्तै, बुटवल उपमहानगरपालिका–११ देविनगरबाट २ लाख २७ हजार ५०० रुपैयाँ बराबरको लु ७१ प ९४९० नम्बरको स्कुटरसहित ४३ थान सुट र १३ थान साडी बरामद गरिएको प्रहरीले जनाएको छ।
सिद्धार्थनगर नगरपालिका–११ पिप्रहैयाबाट ४५ हजार २५ रुपैयाँ बराबरका ८ रोल टेन्टको कपडा, रोहिणी गाउँपालिका–६ बोदवारबाट ६६ हजार रुपैयाँ बराबरको यूपी ५१ सी ५६९६ नम्बरको मोटरसाइकलसहित १९ वटा बोइलर कुखुरा बरामद गरिएको छ।
यसैगरी, सिद्धार्थनगर नगरपालिका–१ बाइपासबाट ६७ हजार रुपैयाँ बराबरका विभिन्न इलेक्ट्रोनिक सामान तथा ४ थान सुरुवाल बरामद भएका छन्। रोहिणी गाउँपालिका–४ चम्कीपुरबाट १ लाख २७ हजार ६०० रुपैयाँ बराबरको यूपी ५६ एवाई ५८३५ नम्बरको मोटरसाइकलसहित १२ वटा बोइलर कुखुरा, ३२ किलो स्याउ र १६ किलो अनार बरामद गरिएको छ।
सिद्धार्थनगर नगरपालिका–१ डण्डापुलबाट १ लाख ८७ हजार ५०० रुपैयाँ बराबरका विभिन्न किराना सामान तथा औषधि, बेलहिया बसपार्कबाट ३७ हजार ४२० रुपैयाँ बराबरको पाउडर दूध ४० प्याकेट, २५० मिलिलिटरका १० बोतल कोक, १० किलो चिनी र २ प्याकेट गुलमञ्जन बरामद गरिएको प्रहरीले जनाएको छ। त्यस्तै, सिद्धार्थनगर–१ बेलहियाबाट ३ लाख ५ हजार ८९० रुपैयाँ बराबरका विभिन्न कस्मेटिक सामानसमेत बरामद गरिएको छ।
बरामद गरिएका सामानमध्ये आवश्यक कारबाहीका लागि पशुजन्य वस्तु तथा कुखुरालाई पशु क्वारेन्टाइन कार्यालय भैरहवा र अन्य सामान तथा सवारीसाधनलाई भन्सार कार्यालय बेलहिया, रुपन्देहीमा पठाइएको जिल्ला प्रहरी कार्यालय रुपन्देहीले जनाएको छ।

प्रकाशित मिति: शनिबार, असोज ३, २०८३ १८:१९