विजय सागरको "महाभूकम्प" सार्वजनिक

समाचार

गृहपृष्ठ
समाचार
विजय सागरको "महाभूकम्प" सार्वजनिक

विजय सागरको "महाभूकम्प" सार्वजनिक

आइतबार, जेठ १७, २०८३ कञ्चन खवर

१७ जेठ, भैरहवा
भैरहवाका साहित्यकार विजयसागरद्वारा लिखित ‘महाभूकम्प’ कथा संग्रह विमोचन भयो । शुक्रबार विवरुका परिवारजन विजयसागरका जीवन सहयात्री उषा श्रेष्ठ, निराकारका जीवन सहयात्री दुर्गा शर्मा, ज्ञवालीका जीवन सहयात्री इन्दिरा ज्ञवाली र विजयसागरका पुत्रवधु जुप्ला श्रेष्ठ तथा नातिनी शैला श्रेष्ठले ‘महाभूकम्प’ कथा संग्रहको संयुक्त रुपमा विमोचन गरेका हुन् ।
२०६६ सालदेखि भैहरवाका सुपरिचित साहित्यकारहरु विजयसागर, वनमाली निराकार र रुद्र ज्ञवालीको साहित्यिक समूह ‘विवरु’ का रुपमा स्थापित छ । भैरहवाको सहिद स्मृति पुस्तकालयमा विवरुद्वारा आयोजित विमोचन कार्यक्रममा रुपन्देही र नवलपरासीका साहित्यकार तथा साहित्यानुरागीहरुको उल्लेख्य सहभागिता रहेको थियो । कार्यक्रममा उपस्थितिलाई स्वागत गर्दै साहित्यकार वनमाली निराकारले ‘विवरु’ साहित्यिक समूह गठनबारे जानकारी दिनुभयो । साथै साहित्यकार वनमालीले विवरुलाई साहित्यिक क्षेत्रमा सक्रिय हुन पाश्र्वमा बसेर योगदान दिने महिलाहरुलाई चिनाउन उनीहरुबाटै ‘महाभूकम्प’ कृति लोर्कापण गराएको स्पष्ट पार्नु भयो ।

कार्यक्रममा प्रशिद्ध गजलकार प्राज्ञ बुँद रानाले कथाकार विजयसागर राम्रा मानिसका लागि सौम्य तर दुर्जनका लागि सङ्गिनजस्तै धारिलो हुनुहुन्छ भन्नुभयो । सहिद स्मृति पुस्तकालयका सल्लाहकार डिआर शर्माले साहित्यकार भनेका देश र जनतामा समर्पित तपस्वीहरु हुन् भन्नुभयो । पुस्तकालयका संरक्षक दीर्घराज काफ्लेको भनाइलाई समर्थन गर्दै गोविन्दवल्लभ भट्टले विजयसागर मालपोतमा काम गर्ने तर घुस नखाने नमूना मानिस हो भन्नुभयो । साहित्यकार डिल्लीराज भट्टराईले ‘महाभूकम्प’ को समीक्षा गर्दै कथा संग्रहमा सामाजिक यथार्थवादी कथाहरु सङ्कलित भएको बताउनु भयो ।
विमोचन कार्यक्रममा नवपरासी साहित्य परिषदका अध्यक्ष श्याम प्रसाद न्यौपाने, सिर्जनशील साहित्यिक समाज, रुपन्देहीका अध्यक्ष सरु ज्ञवाली, समाजसेवी मिना श्रेष्ठ, मदन पौड्याल, सुन्दर वासी, तेजनिधी पौडेल, चन्द्रप्रकाश श्रेष्ठलगायतले शुभकामना व्यक्त गर्नुभयो ।
रुद्र ज्ञवालीले सञ्चालन गरेको उक्त विमोचन कार्यक्रममा कथाकार विजयसागरले ‘महाभूकम्प’ मा सङ्कलित कथाहरु मधुपर्कलगायत साहित्यिक पत्रिकाहरुमा प्रकाशित रचनाहरु हुन् भन्नुभयो ।