रमुवामा भिर मौरीको मह शिकार सम्पन्न

समाचार

गृहपृष्ठ
समाचार
रमुवामा भिर मौरीको मह शिकार सम्पन्न

रमुवामा भिर मौरीको मह शिकार सम्पन्न

मंगलबार, जेठ ५, २०८३ कञ्चन खवर

५ जेठ, बागलुङ्ग/सुरेश छन्त्याल
बागलुङ्गको गल्कोट नगरपालिका–१०, रमुवामा परम्परागत भिर मौरीको मह काढ्ने (मह शिकार) कार्यक्रम सम्पन्न भएको छ। सरस्वती युवा क्लबको ३८ औं वार्षिकोत्सव तथा मह महोत्सवको अवसर पारेर उक्त साहसिक कार्यको आयोजना गरिएको हो।
कार्यक्रममा प्रमुख अथिति गण्डकी प्रदेश सभा सदस्य (सांसद) द्रोण कुँवरले बागलुङको गौरवशाली परम्परा, साहसिक मौरी मह संकलन संस्कृति र स्थानीय पहिचानलाई विश्वसामु चिनाउन यो उत्सवले महत्त्वपूर्ण भूमिका खेल्ने विश्वास व्यक्त गर्नुभयो। भिर मौरीको मह शिकार केवल एक परम्परा मात्र होइन, यो नेपाली साहस, प्रकृतिप्रतिको सम्मान र समुदायको एकताको प्रतीक रहेको सांसद कुँवरले भन्नुभयो। सोही अवसरमा उहाँले पाण्डबखानीमा अवस्थित ठुलो माउखोलामा मोटरेवल पुल निर्माण गर्ने र रमुवामा पनि सोही प्रकृतिको पुलको डिपिआर गर्ने प्रतिबद्धता व्यक्त गर्नुभयो।
अग्ला र डरलाग्दा भीरहरूमा डोरी (चोयाको भर्‍याङ) को सहारामा झुन्डिएर जंगली मौरीको मह संकलन गर्ने यो परम्परा विशेषगरी नेपाली भूगोलका गुरुङ र मगर समुदायको इतिहास र संस्कृतिसँग जोडिएको छ। भीरमा ज्यानको बाजी लगाएर गरिने यो साहसिक तथा सांस्कृतिक गतिविधिले स्थानीय परम्परा र प्रकृतिप्रतिको गहिरो सम्बन्धलाई स्पष्ट रूपमा झल्काउँछ। यसलाई साहस, संस्कृति र प्रकृतिको अद्भुत संगमको रूपमा हेरिने गरिन्छ।
यस वर्षको मह शिकारलाई थप आकर्षण दिन र विश्वभर प्रवर्द्धन गर्न नेपालका लोकप्रिय भ्लगर ुज्याक दाइु समेत गल्कोटको रमुवा पुगेका छन्। उनले रमुवाको यो विश्वप्रसिद्ध र रोमाञ्चक मह शिकारको दृश्यलाई आफ्नो क्यामेरामा कैद गरिरहेका छन्, जसले गर्दा यो क्षेत्रको पर्यटन प्रवर्द्धनमा ठूलो टेवा पुग्ने स्थानीयको अपेक्षा छ।
महोत्सवलाई थप रोमान्चक बनाउन आयोजक सरस्वती युवा क्लब रमुवाले विभिन्न खेलकुद तथा सांस्कृतिक प्रतियोगिताहरूको समेत आयोजना गरेको छ। क्लबको ३८ औं वार्षिकोत्सवका अवसरमा वडा स्तरीय पुरुष भलिबल, प्रौढ भलिबल, सामूहिक लोक नृत्य प्रतियोगिता, परम्परागत लुठो तान्ने (डोरी तान्ने) र छेलो हान्ने लगायतका विविध प्रतियोगिताहरू सञ्चालन भइरहेका छन्।
खेल तथा सांस्कृतिक कार्यक्रमहरूमा स्थानीय बासिन्दा तथा आसपासका क्षेत्रबाट ठूलो संख्यामा दर्शकहरूको उपस्थिति रहेको छ।

प्रकाशित मिति: मंगलबार, जेठ ५, २०८३ २१:५४