गोवर्द्धन पूजा तथा गोरु तिहार आज, कृषि कर्ममा सहयोग गर्ने गोरुको विशेष पूजा गरिँदै

समाचार

गृहपृष्ठ
समाचार
गोवर्द्धन पूजा तथा गोरु तिहार आज, कृषि कर्ममा सहयोग गर्ने गोरुको विशेष पूजा गरिँदै

गोवर्द्धन पूजा तथा गोरु तिहार आज, कृषि कर्ममा सहयोग गर्ने गोरुको विशेष पूजा गरिँदै

मंगलबार, कात्तिक २४, २०८३ कञ्चन खवर

२४ कात्तिक, कञ्चन
हिन्दू धर्मावलम्बीहरूको दोस्रो ठूलो चाड तिहारअन्तर्गत आज कार्तिक शुक्ल प्रतिपदाका दिन गोवर्द्धन पूजा तथा गोरु तिहार मनाइँदै छ। यस पर्वलाई हल तिहारका रूपमा समेत चिनिन्छ।
यस दिन गोवर्द्धन पर्वत, गाई, गोरु तथा कृषिमा प्रयोग हुने विभिन्न उपकरणहरूको पूजा गर्ने परम्परा छ। विशेषगरी कृषि कर्ममा किसानका सहयोगीका रूपमा रहेका गोरुको सम्मान गर्दै नुहाइदिने, माला लगाइदिने र मिठा परिकार खुवाएर पूजा गर्ने चलन छ। त्यस्तै, हलो तथा अन्य कृषि औजारको समेत पूजाआजा गरिन्छ।
धार्मिक मान्यताअनुसार, भगवान् श्रीकृष्णले गोकुलवासीलाई वर्षाका देवता इन्द्रको सट्टा आफूहरूलाई घाँस, पानी, दाउरा र खनिज उपलब्ध गराउने गोवर्द्धन पर्वतको पूजा गर्न प्रेरित गरेका थिए। यसबाट क्रोधित भएका इन्द्रले गोकुलमा मुसलधारे वर्षा र असिना गराएपछि श्रीकृष्णले गोवर्द्धन पर्वतलाई कान्छी औँलाले उचालेर गोकुलवासीको रक्षा गरेको पौराणिक कथा प्रचलित छ। सोही घटनाको स्मरणमा गोवर्द्धन पूजा गर्ने परम्परा सुरु भएको धार्मिक विश्वास छ।
गोवर्द्धन पूजाका अवसरमा घरआँगनमा गाईको गोबरबाट गोवर्द्धन पर्वतको प्रतीकात्मक आकृति बनाई विधिपूर्वक पूजा गरिन्छ। यस पर्वले प्रकृति, पशुपक्षी र कृषि कर्मबीचको अन्योन्याश्रित सम्बन्धलाई समेत उजागर गर्छ।
कृषिमा गोरुको योगदानको सम्मान गर्नुका साथै प्रकृति र पशुधनप्रति कृतज्ञता व्यक्त गर्ने पर्वका रूपमा गोवर्द्धन पूजा तथा गोरु तिहारलाई लिने गरिन्छ।

प्रकाशित मिति: मंगलबार, कात्तिक २४, २०८३ ०६:१७