रुपन्देहीमा विभिन्न मुद्दाका ७ जना फरार प्रतिवादी पक्राउ

समाचार

गृहपृष्ठ
समाचार
रुपन्देहीमा विभिन्न मुद्दाका ७ जना फरार प्रतिवादी पक्राउ

रुपन्देहीमा विभिन्न मुद्दाका ७ जना फरार प्रतिवादी पक्राउ

बिहीबार, कात्तिक १२, २०८३ कञ्चन खवर

१२ कात्तिक, कञ्चन
रुपन्देही प्रहरीले विभिन्न मुद्दामा अदालतबाट कैद तथा जरिवाना सजाय तोकिएपछि फरार रहेका सात जना प्रतिवादीलाई पक्राउ गरेको छ।
जिल्ला प्रहरी कार्यालय रुपन्देही तथा मातहतका कार्यालयबाट खटिएको संयुक्त प्रहरी टोलीले अदालतको फैसला कार्यान्वयन गर्ने क्रममा बुधबार जिल्लाका विभिन्न स्थानबाट उनीहरूलाई पक्राउ गरेको हो।
प्रहरीका अनुसार पक्राउ पर्नेमा चोरी मुद्दामा रोहिणी गाउँपालिका–२ पोखरभिण्डीका आकाश यादव, बैंकिङ कसुर मुद्दामा लुम्बिनी सांस्कृतिक नगरपालिका–८ एकलाका रिक्कु यादव, अभद्र व्यवहार मुद्दामा सियारी गाउँपालिका–४ मुर्गियाका राजन कार्की रहेका छन्।
त्यस्तै, डाँकाचोरी मुद्दामा सियारी गाउँपालिका–२ का सोमुकानु बनिया, लागूऔषध मुद्दामा मायादेवी गाउँपालिका–३ का विपिन मिश्र तथा बैंकिङ कसुर मुद्दामा कोटहीमाई गाउँपालिका–२ का ओमप्रकाश चौधरी र वडा नं. ५ बेनिनगरका अब्दुल रहमान धुनिया पक्राउ परेका छन्।
प्रहरीले सार्वजनिक गरेको विवरणअनुसार चोरी मुद्दाका आकाश यादवलाई दुई महिना कैद र १० हजार रुपैयाँ जरिवाना, बैंकिङ कसुरका रिक्कु यादवलाई १० दिन कैद र एक लाख ३० हजार रुपैयाँ जरिवाना तथा अभद्र व्यवहारका राजन कार्कीलाई सात हजार रुपैयाँ जरिवाना तोकिएको थियो।
यसैगरी, डाँकाचोरी मुद्दाका सोमुकानु बनियालाई चार महिना कैद र १५ हजार रुपैयाँ जरिवाना, लागूऔषध मुद्दाका विपिन मिश्रलाई एक वर्ष कैद तथा बैंकिङ कसुरका ओमप्रकाश चौधरी र अब्दुल रहमान धुनियालाई जनही १५ दिन कैद र चार लाख रुपैयाँ जरिवाना तोकिएको प्रहरीको प्रेस विज्ञप्तिमा उल्लेख छ।
पक्राउ परेका सातै जनालाई आवश्यक कारबाहीका लागि रुपन्देही जिल्ला अदालतमा पेस गरिएको जिल्ला प्रहरी कार्यालय रुपन्देहीले जनाएको छ।