ठूलो लुम्पेक कसिन्थलाकी धनि तरामु टनेल खेतीमा रमाउदै

कृषि

गृहपृष्ठ
कृषि
ठूलो लुम्पेक कसिन्थलाकी धनि तरामु टनेल खेतीमा रमाउदै

ठूलो लुम्पेक कसिन्थलाकी धनि तरामु टनेल खेतीमा रमाउदै

कञ्चन खवर

जगीलाल थापा

शनिबार, मंसिर १५, २०८१

जगीलाल थापा "जेल संघर्ष"
धनी तरामु उमेरले ४० पुगिन । उनमा युवा जोस र जाँगर उत्तिकै छ। गुल्मी जिल्ला सत्यवती गाउँपालिका वडा नं. ३ कसिन्थलाका उनी सफल किसान हुन। १० वर्षदेखि निरन्तर टनेलमा टमाटर खेती गर्दै आएकी धनीको टमाटर लगाउने सात ओटा टनेल छ।
हरेक काममा काँध थाप्ने श्रीमान हस्त बहादुर तरामु सहयात्री छन् । टनेलको हेरचाहमा घरका सबैले हातेमालो गर्छन् । १० वर्ष अगाडि टनेल खेतीबारे उति जानकार नभएकी धनीको अहिले ७ वटा टनेल छ । त्यही टनेलमा टहल्दैमा दिन बित्छ ।
गुल्मीको ठूलो लुम्पेक हरेक मौसमी खेतीका लागि उत्तम ठाउँ हो । सुन्तला, कफी, अम्बा, अमिलो, अमला, कुरिलो, अदुवा, आलु सबैखाले नगदेवाली हुन्छ ।
मेहनत गर्न सके विदेस जान नपर्ने रहेछ भन्ने नमुना पात्र बनेकीछिन धनी । कसिन्थलाको डाँडो अचेल टनेलै टनेलले भरिएको छ । उत्पादित तरकारी घरैमा सहकरीको गाडीले उठाउँछ । त्यतिकै कुहेर र आफन्तलाई बाँडेर सकिने तरकारी अहिले राम्रो मोल पर्न थालेको छ ।
धनी १ छोरा र दुई छोरीका आमा हुन । ठूली छोरीको बिहे भइसकेको छ । एक छोरा र छोरीले गाउँकै धर्मपुर मा.वि. (हाई स्कुल)मा पढ्दैछन। बच्चाको पढाई, घरमा मिठो चोखो खान र लगाउन चाहिने खर्च सबै टमाटर बेचेरै पुराएकी छिन। राम्रो मौसम र मल जल पुर्याउन सके राम्रै फल्ने रहेछ टमाटर।फल्ने रहेछ । भाउ नपर्दाका बेला पनि कुहेर फाल्नु भन्दा एक रुपैया भएपनि पैसा पारुम भन्ने सोंचको विकास भएको रहेछ ।
पाँच ओटा टनेलबाट सुरु गरेको खेतीले राम्रो फसल दियो । राम्रो मौसम र मल जल पाएर फसल राम्रै उत्पादन भयो । उत्पादित फसलले बजार पनि पायो । त्यसले टनेल खेतीप्रति थप उत्साह बढ्यो । अनि पाँचबाट सात टनेल पुग्यो । यसरी बढ्दै गएको खेतिबाट यति नै कमाई भयो भनेर हिसाव छैन । जेहोस घरमै बसेर राम्रै गुजरा चलेको छ ।
धनीको कृषि कर्ममा वडा तथा पालिकाको पनि लगानी र मार्गदर्शन उत्तिकै छ । आफ्नै पौरखले घर चलेको छ । कसैको आश गर्न परेको छैन । यस वर्ष टमाटरले राम्रै मुल्य पाए । कृषकको उत्पादन खेर नजाने जिम्मा स्थानीय लुम्पेकी कृषि बहुउद्धेश्य सहकारी संस्थाले लिएबाट धनी अझ उत्साहित भएकी छिन ।
लुम्पेकमा उत्पादन भएका तरकारीले बुटवल बजारको मागलाई ठेग्न सकेको छैन । बुटवलको पुरानो बसपार्क स्थित तरकारी मन्दीको २८ नम्वर सटरमा लुम्पेकी उत्पादन पाइन्छ । धनीले उत्पादन गरेको टमाटर पनि त्यही सटरमा पुग्छन् । लुम्पेकी उत्पादनले अहिलेसम्म ग्राहक पर्खन परेको छैन ।
यतिबेला लुम्पेकी टिमुर, टुसा र बाँकोको सिन्कीले बजार तताएको छ । माग बढ्दो छ । लुम्पेकको उत्पादनले बुटवल बजारलाई मात्र पनि पुराउन सकेको छैन । लुम्पेकी भनेर अन्य ठाउँको उत्पादन बेचेर बैमानी पनि हुन चाहन्न लुम्पेकी उत्पादक । बजारमा लुम्पेक छुट्टै ब्राण्ड बनेको छ । लुम्पेकी सिमी, कोदो, फापर, लटे, सुन्तला, फर्सी, चटेला, सिस्नोको बजारमा निकै माग छ । लुम्पेकको सिस्नो टिपेर बुटवलसम्म पठाए मात्र पनि बिदेशमा हुने कमाई लुम्पेकमै हुन सक्छ । यसको लागि कृषिप्रति युवामा लगाब हुनुपर्ने ठान्छिन धनी ।
ठूलो लुम्पेकको कसिन्थला तरकारी खेतीका लागि पकेट क्षेत्रको रुपमा पालिकाले विकास गर्नसके कृषिप्रति अझ लगाब बढ्दै जाने थियो । धनी जस्ता कृषि मोह भएका कृषक बृढि हुन सके लुम्पेक मात्र होइन सिंगो देश कृषिमा आत्मनिर्भर हुने थियो । गाउँ आत्मनिर्भर भएमा विकासका अनेकन दैलो उघारिँदै जानेथियो ।

प्रकाशित मिति: शनिबार, मंसिर १५, २०८१ ०९:२५

प्रतिक्रिया दिनुहोस्