गाई तिहारे औँसीमा मौन स्नान र जलदान गर्न दीपा शिवाकोटीको आग्रह

समाचार

गृहपृष्ठ
समाचार
गाई तिहारे औँसीमा मौन स्नान र जलदान गर्न दीपा शिवाकोटीको आग्रह

गाई तिहारे औँसीमा मौन स्नान र जलदान गर्न दीपा शिवाकोटीको आग्रह

आइतबार, कात्तिक २२, २०८३ कञ्चन खवर

२२ कार्तिक, काठमाण्डौ
धर्म तथा संस्कृति जगेर्नाका लागि सामाजिक सञ्जालमार्फत धार्मिक तथा शास्त्रीय सन्देश प्रवाह गर्दै आएकी दीपा शिवाकोटीले गाई तिहारे औँसीको विशेष अवसरमा विधिपूर्वक गरिने स्नान र जलदानले जीवनभर पितृदोषबाट मुक्ति मिल्ने बताएकी छन्। कार्तिक २३ गते सोमबार परेको गाई तिहारे औँसीका दिन विशेष नियमको पालना गरी गरिने कर्मले पितृ तृप्त हुने र ठूलो धार्मिक फल प्राप्त हुने उनको भनाइ छ।
भिडिओ सन्देशमार्फत पितृदोष निवारणको सरल तथा प्रभावकारी विधिबारे जानकारी दिँदै शिवाकोटीले भनिन्, “जिन्दगीमा पितृदोष लाग्दैन, गाई तिहारे औँसीको दिन यो काम गर्नुहोस्। बिहान उठ्नुहोस्, कसैसँग नबोलीकन नुहाउनुहोस्, र कसैसँग नबोली पितृको नाममा एउटा तामाको लोटा लिनुहोस् र त्यसमा जल भर्नुहोस्, तील राख्नुहोस् र छोरा मान्छेको हातबाट ३६ पल्ट झारिदिनुहोस्।”
यसैगरी पितृ शान्ति तथा पारिवारिक कल्याणका लागि घरको तुलसीको मोठमा दीप प्रज्वलन गर्न सुझाव दिँदै उनले थपिन्, “त्यस पछाडि तपाईंहरूले तुलसीको मोठमा सातवटा बत्ती बाल्नुहोस्, दीप बाल्नुहोस्, बिहान–बेलुकै। यति गर्नुभयो भने कहिल्यै पनि पितृदोष लाग्दैन।”
सोमबार पर्ने औँसी (सोमबारे औँसी) र त्यसमाथि गाई तिहारको संयोग धार्मिक रूपमा अत्यन्तै दुर्लभ र पुण्यदायी मानिने चर्चा गर्दै शिवाकोटीले मौन स्नानको महत्त्वबारे भनिन्, “गाई तिहारे औँसी सोमबार नबोलीकन नुहाउनुभयो भने एक हजार गाई दान गरेको प्रतिफल पाइन्छ भन्ने भनाइ छ।” उनले सबैको कल्याणको कामना गर्दै शुभ तिहार र महालक्ष्मीको कृपा सबैमा रहोस् भन्ने शुभकामनासमेत व्यक्त गरेकी छन्।

प्रकाशित मिति: आइतबार, कात्तिक २२, २०८३ ०७:१९