आयुर्वेदिक चिकित्सा पद्धतिप्रति नयाँ पुस्तालाई आकर्षित गर्नुपर्नेमा जोड

समाचार

गृहपृष्ठ
समाचार
आयुर्वेदिक चिकित्सा पद्धतिप्रति नयाँ पुस्तालाई आकर्षित गर्नुपर्नेमा जोड

आयुर्वेदिक चिकित्सा पद्धतिप्रति नयाँ पुस्तालाई आकर्षित गर्नुपर्नेमा जोड

शनिबार, कात्तिक २१, २०८३ कञ्चन खवर

२१ कार्तिक, कञ्चन
आयुर्वेदिक चिकित्सा पद्धतिप्रति नयाँ पुस्तालाई समेत आकर्षित गर्नुपर्नेमा सरोकारवालाले जोड दिएका छन्। कञ्चन गाउँपालिका अध्यक्ष नवराज ढकालले आयुर्वेदिक उपचार पद्धतिको महत्व बढ्दै गएको उल्लेख गर्दै स्थानीयस्तरमा आयुर्वेद सेवाको विस्तार र विकास आवश्यक रहेको बताउनु भएको हो ।
रुद्रपुर आयुर्वेद औषधालय, कञ्चन–३ हरैयाको आयोजनामा धन्वन्तरी जयन्ती तथा राष्ट्रिय आरोग्यता दिवसका अवसरमा आयोजित कार्यक्रममा बोल्दै अध्यक्ष ढकालले कञ्चनस्थित आयुर्वेद औषधालयको भौतिक पूर्वाधार विकाससँगै चिकित्सा सेवामा समेत थप व्यवस्थापन गरिने बताउनु भएको थियो। औषधालयले जडीबुटी खेती प्रवर्द्धनका लागि वार्षिक कार्यक्रम नै तय गरेर अघि बढ्नुपर्नेमा जोड दिदै अध्यक्ष ढकालले रुद्रपुर आयुर्वेद औषधालयबाट सेवा लिने सेवाग्राहीको सङ्ख्या बढ्दै जानु सकारात्मक पक्ष भएको उल्लेख गरे।
कार्यक्रमका विशिष्ट अतिथि कञ्चन गाउँपालिकाका निवर्तमान अध्यक्ष गोकर्णबहादुर क्षेत्रीले उमेर बढ्दै जाँदा योगाभ्यास र आयुर्वेदिक चिकित्सा पद्धतिप्रति मानिसको चासो तथा आकर्षण बढ्ने गरेको बताउनु भयो। आयुर्वेदको महत्व र उपयोगिताबारे नयाँ पुस्तालाई समेत जानकारी गराउँदै यसप्रति आकर्षित गर्नुपर्ने धारणा समेत क्षेत्रीले व्यक्त गर्नु भएको थियो।
कार्यक्रममा रुद्रपुर आयुर्वेद औषधालयका कार्यालय प्रमुख खिमानन्द खनालले स्वागत मन्तव्य राख्दै कार्यक्रमको औचित्यमाथि प्रकाश पार्नु भएको थियो। वहाँले आयुर्वेद मानव स्वास्थ्य, रोगको निदान, उपचार, औषधि विज्ञान तथा दीर्घजीवनसँग सम्बन्धित समग्र ज्ञान र विज्ञान भएको उल्लेख गर्नु भएको थियो।
कार्यक्रमका अध्यक्ष तथा कञ्चन गाउँपालिका वडा नं. ३ का वडा अध्यक्ष टीकाराम सापकोटाले आयुर्वेदलाई अथर्ववेदसँग सम्बन्धित उपवेदका रूपमा व्याख्या गर्दै मानव जीवनलाई स्वस्थ, निरोगी र दीर्घजीवी बनाउनु यसको मूल उद्देश्य रहेको बताएउनु भएको थियो । रुद्रपुर आयुर्वेद औषधालय व्यवस्थापन समितिका अध्यक्ष समेत रहनु भएका वडा अध्यक्ष सापकोटाले चिकित्सा क्षेत्रमा भगवान् धन्वन्तरीको योगदान र आयुर्वेदको ऐतिहासिक महत्वबारे चर्चा गर्नु भएको थियो।
कार्यक्रममा ठाकुरप्रसाद आचार्यले पौराणिक मान्यताअनुसार समुद्रमन्थनका क्रममा भगवान् धन्वन्तरी अमृतकलश, आयुर्वेद ग्रन्थ तथा जडीबुटीसहित प्रकट भएको धार्मिक प्रसङ्गबारे जानकारी गराउनु भएको थियो ।
हिन्दू धार्मिक परम्पराअनुसार प्रत्येक वर्ष कार्तिक कृष्ण त्रयोदशीलाई धन्वन्तरी जयन्तीका रूपमा मनाउने गरिन्छ। कतिपय समुदायमा यस दिनलाई धनतेरस वा धन्तरेससमेत भन्ने चलन छ। यस अवसरमा भगवान् धन्वन्तरीको पूजा आराधना गर्दै आरोग्यता, निरोगिता र दीर्घजीवनको कामना गर्ने धार्मिक तथा सांस्कृतिक परम्परा रहेको छ।
‘प्रकृति अनुकूल आहार, औषध र विहार रोगमुक्त समाजको आधार’ भन्ने नारासहित आयोजित कार्यक्रममा जनप्रतिनिधि, कर्मचारी तथा स्थानीय सरोकारवालाहरूको सहभागिता रहेको थियो। कार्यक्रमको सञ्चालन जगीलाल थापाले गरेका थिए।

प्रकाशित मिति: शनिबार, कात्तिक २१, २०८३ १३:४७