रविको आफ्नै कार्यकर्तालाई चेतावनी : जनमतको दुरुपयोग नगर्नुस्

समाचार

गृहपृष्ठ
समाचार
रविको आफ्नै कार्यकर्तालाई चेतावनी : जनमतको दुरुपयोग नगर्नुस्

रविको आफ्नै कार्यकर्तालाई चेतावनी : जनमतको दुरुपयोग नगर्नुस्

शुक्रबार, कात्तिक २०, २०८३ कञ्चन खवर

२० कार्तिक, काठमाण्डौ
शुक्रबार चितवनको पार्टी मञ्चमा देखिएका राष्ट्रिय स्वतन्त्र पार्टी (रास्वपा) का सभापति रवि लामिछाने विपक्षीमाथि खनिने मुडमा थिएनन्। न त उनले परम्परागत दलहरूको पुरानो विकृतिमाथि भाषण गरे। यसपटक उनको सम्पूर्ण प्रहार आफ्नै दलका सांसद, नेता र कार्यकर्तामाझ सोझिएको थियो। पार्टी सत्ता, संसद् र जनमतको केन्द्रमा पुगेपछि भित्रभित्रै मौलाएको ‘शक्तिको उन्माद’ र ‘पदको भोक’ माथि उनले कडा शल्यक्रिया गरे।
“आज हामी ठूला पार्टी भयौँ, हाम्रा हातमा पुलिस छन्, हाम्रा हातमा सीडीओ छन् भन्ने दम्भ त्याग्नुपर्छ,” आफ्नै कार्यकर्ताको आँखामा हेर्दै लामिछानेले भने, “जनताले दिएको यो अभिमत जनताकै हुर्मत लिनका लागि दुरुपयोग नगर्नुहोला।” शक्ति प्राप्त हुँदा अहंकार होइन, सबैभन्दा बढी जिम्मेवार बन्नुपर्ने यथार्थ उनले स्मरण गराए।
चितवनको सम्बोधनमा लामिछानेले पार्टीभित्र हुर्किँदै गरेको वर्ग-विभाजनलाई समेत छताछुल्ल पारे। चुनाव जितेर ‘माननीय’ बनेकाहरूले भुइँ तहका साथीहरूलाई गन्न छोडेको र चुनाव नजितेकाहरूले सांसद बनेकाहरूप्रति आरिस र कुरा काट्ने रोग पालेको भन्दै उनले संगठनको भित्री घाउ कोट्याए। “सँगै सङ्घर्ष गरेको साथी आज सांसद हुँदा आरिस गर्ने र सँगै भएको साथी तल पर्‍यो भनेर खिचातानी गर्ने दुवै बानी पार्टीका लागि विष हुन्,” उनको चेतावनी थियो।
भाषणको अन्त्यतिर लामिछानेले टिकट वितरण र पदलोलुपतामाथि तीखो व्यङ्ग्य प्रहार गरे। भुइँ तहको वडाध्यक्ष बन्न कोही तयार नहुने तर सबैको नजर माथिल्लो ओहोदामा मात्रै पर्ने प्रवृत्तिप्रति कटाक्ष गर्दै उनले भने, “कसैलाई वडाध्यक्ष हुन मन छैन भने अब यो वडामा चुनाव लड्न म आफैँ राजीनामा दिएर आउनुपर्ला जस्तो छ। तपाईंहरू त धेरै ठूला हुन थाल्नुभयो।”

प्रकाशित मिति: शुक्रबार, कात्तिक २०, २०८३ १९:४४