समाजलाई आमूल परिवर्तनको लागि निःस्वार्थपूर्वक सेवा गर्ने नयाँ पुस्ता तयार गर्नु आवश्यक

समाचार

गृहपृष्ठ
समाचार
समाजलाई आमूल परिवर्तनको लागि निःस्वार्थपूर्वक सेवा गर्ने नयाँ पुस्ता तयार गर्नु आवश्यक

समाजलाई आमूल परिवर्तनको लागि निःस्वार्थपूर्वक सेवा गर्ने नयाँ पुस्ता तयार गर्नु आवश्यक

बिहीबार, चैत १४, २०८१ कञ्चन खवर

१४ चैत्र, भक्तपुर
ख्वप माध्यमिक विद्यालय, ख्वप कलेज, शारदा क्याम्पस मा.वि. र ख्वप कलेज अफ ल मा कार्यरत शिक्षक तथा कर्मचारीहरूको भेला सोमबार सम्पन्न भयो ।
अन्तर्राष्ट्रिय श्रमिक दिवसको सन्दर्भ एवं समसामयिक विषयमा जानकारी दिने उद्देश्यले भएको उक्त कार्यक्रममा नेपाल मजदुर किसान पार्टीका अध्यक्ष नारायणमान बिजुक्छेँ (रोहित) ले हरेक घटना र विचारलाई व्यापक दृष्टिकोणले हेर्नु जरूरी भएको बताउनुभयो ।
देश र जनताको इमानदारीपूर्वक सेवा गर्ने लक्ष्य लिएकाहरूलाई पुँजीवादी बन्दोबस्तमा सहजरूपमा काम गर्न नदिने भएकोले नै सङ्घर्षको सहारा लिनुपर्ने धारणा उहाँले व्यक्त गर्नुभयो ।
“पुँजीवादी दृष्टिकोणका शासक पार्टीका मन्त्रीहरूबाट कामदार जनताको हित हुनेछैन । सङ्घर्षविना आमूल परिवर्तन सम्भव नहुने भएकोले क्रान्तिको आधारशीला तयारी गर्नु सच्चा देशभक्तहरूको कर्तव्य हो”, अध्यक्ष बिजुक्छेँले भन्नुभयो ।
नैतिक, बौद्धिक र शारीरिकरूपमा सक्षम भएमात्र विरोधीहरूसँग प्रतिस्पर्धा गर्न सकिने भएकोले हाम्रा कलेजले नयाँ पुस्तालाई हरेक क्षेत्रमा अब्बल बनाउनु जरूरी भएको उहाँले बताउनुभयो ।
समाजलाई आमूल परिवर्तनको लागि निःस्वार्थपूर्वक सेवा गर्ने नयाँ पुस्ता तयार गर्नु ख्वप कलेजहरूको उद्देश्य हुनुपर्ने उल्लेख गर्दै अध्यक्ष बिजुक्छेँले हामीले गर्ने हरेक गतिविधि समाज र राष्ट्रको योगदानमा टेवा पुग्ने खालको हुनुपर्छ भन्नुभयो ।
समाजवाद आउन एक ऐतिहासिक युग लाग्न सक्ने भएकोले अहिलेदेखि नै गतिविधिमार्फत सङ्घर्षलाई निरन्तरता दिनुपर्नेमा जोड दिँदै अध्यक्ष बिजुक्छेँले भन्नुभयो, “हाम्रो गतिविधि र आचरण समाजवादी विचारधारासँग मिल्नु जरूरी छ । समाजवादी विचारधाराले तडकभडकलाई निरूत्साहित र शारीरिक श्रमलाई सम्मान गर्नुका साथै उत्पादनलाई प्राथमिकतामा राख्छ ।”
“आत्मसमीक्षा, आलोचना र आत्मालोचना जरूरी भएको उल्लेख गर्दै उहाँले भन्नुभयो, “व्यक्तिगतभन्दा सामूहिक हितलाई प्राथमिकतामा राख्नुपर्छ† व्यक्तिवादी सोच र प्रवृत्ति त्याग्नु जरूरी छ । नैतिकरूपमा पतन हुनु ठुलो खतरा भएकोले नैतिक मूल्य–मान्यतालाई जोगाउनु जरूरी छ । खराब विचार मनमा आउनु पनि गलत हो । प्राचार्यदेखि कर्मचारीहरूले आर्थिक अनुशासनमा रही काम गरेकै कारण ख्वप कलेजहरूप्रति जनताको विश्वास बढेको हो ।”
सङ्गठनले दिएको जिम्मेवारीलाई इमानदारीपूर्वक पालना गर्नुपर्ने आवश्यकता औँल्याउँदै उहाँले जिम्मेवारीबाट पन्छिने भगुवाप्रवृत्तिको आलोचना गर्नुभयो ।
अध्यक्ष बिजुक्छेँले भन्नुभयो, “समाजवादी शिक्षाको लागि ख्वप विश्वविद्यालय स्थापना गर्नु जरूरी छ । हामी नाफाको लागि होइन, परल मूल्यमा गुणस्तरीय शिक्षा दिन ख्वप विश्वविद्यालय स्थापना गछौँ । समर्थक र शुभचिन्तकहरूबाट पार्टीलाई प्राप्त सहयोगबाट पार्टीले पुस्तक र पत्रिकाहरू प्रकाशन गरी जनतालाई राजनीतिकरूपमा सचेत पार्ने काम गर्दै छ । हामीले गर्ने हरेक गतिविधिले जनतालाई निरास होइन; ऊर्जा दिइरहेको छ ।”
भक्तपुर नगरपालिकाका प्रमुख एवं कलेज/विद्यालय सञ्चालक समितिका अध्यक्ष सुनिल प्रजापतिले भनपाबाट सञ्चालित कलेजहरू जनताको कलेज भएकोले विद्यार्थीको उज्ज्वल भविष्य र अभिभावकहरूको मन जित्ने गरी शिक्षा दिनु जरूरी छ भन्नुभयो ।
हाम्रो मूल्याड्ढन आफूले भन्दा अरू पक्षबाट हुने चर्चा गर्दै प्रमुख प्रजापतिले भन्नुभयो, “भक्तपुर नगरपालिकाले देश र जनताको पक्षमा गरेका कामको मूल्याड्ढन अहिले बिस्तारै हुँदै छ ।”
कामदारवर्गका जनतालाई शिक्षाबाट वञ्चित गर्ने बदनियतकै कारण ख्वप विश्वविद्यालयको विधेयक पारित नगरेको स्पष्ट पार्दै उहाँले ख्वप विश्वविद्यालयलाई स्वीकृति दिन सरकारलाई बाध्य पार्ने परिस्थिति बनाउनेतर्फ हाम्रा कलेजहरूको गतिविधि केन्द्रित हुनु जरूरी छ भन्नुभयो ।
जनतालाई अगाडि बढ्न नदिने उद्देश्यका साथ शासक पार्टीहरूले षड्यन्त्रमूलक ढङ्गमा दुईदलीय तानाशाही ल्याउन खोज्दै छन् । निर्वाचन आयोगको हालै प्रकाशित विज्ञप्तिमार्फत मतसीमा (थ्रेसहोल्ड) का आधारमा राष्ट्रिय र प्रादेशिक पार्टीको प्रावधान ल्याउन खोज्नु प्रजातन्त्रको भावनाविपरीत छ । जनताले तिरेको करलाई प्राप्त मतको आधारमा राजनीतिक पार्टीलाई अनुदान दिने नीति राजस्व दुरूपयोग हो र अन्ततः यसले दुईदलीय तानाशाही निम्त्याउँछ”, प्रमुख प्रजापतिले भन्नुभयो ।
शासक पार्टीहरू सङ्घीयतालाई कार्यान्वयन गर्न नचाहेको स्पष्ट पार्दै उहाँले सङ्घीयताको मर्मअनुसार स्थानीय तहलाई स्वायत्त बनाउनुपर्ने र विकास निर्माणका कामहरू स्थानीय तहमार्फत गराउनुपर्नेमा जोड दिनुभयो ।
सरकारको गलत शिक्षा नीतिकै कारण ५ सत्न्दा बढी कलेजहरू बन्द हुने स्थितिमा पुगेको प्रमुख प्रजापतिले बताउनुभयो ।
भक्तपुर नगरपालिकाका उपप्रमुख एवं कलेज/विद्यालय सञ्चालक समितिका उपाध्यक्ष रजनी जोशीले महिला अधिकारको लागि नभई समाज परिवर्तनको लागि समाजवादी व्यवस्था स्थापना गर्नु जरूरी भएको बताउनुभयो ।
समाजवादी व्यवस्थामा मात्र महिलाको मुक्ति सम्भव छ भन्ने यथार्थ सोभियत सङ्घ, प्रजग कोरिया र क्युवाको समाजवादी क्रान्तिले प्रमाणित गरेको उहाँले बताउनुभयो ।
महिलालाई आरक्षणभन्दा अवसर र शिक्षा दिनुपर्ने आवश्यक भएको उल्लेख गर्दै उपप्रमुख जोशीले भनपाले समाजवादी आधारशीला निर्माण गर्ने कार्यहरू गर्दै आएको बताउनुभयो ।
ख्वप कलेजका प्राचार्य प्रकाशकुमार श्रेष्ठले जीवनमा आइपर्ने उत्तारचढावमा संयमित भएर अघि बढ्न सकेमात्र सफल हुने बताउनुभयो ।
उहाँले भन्नुभयो, “हाम्रो शिक्षण पद्धतिमा युग सुहाउँदो हुने गरी हेरफेर गर्नु आवश्यक छ । सांस्कृतिक विविधताप्रति हामी सचेत हुनु जरूरी छ ।”
ख्वप कलेज अफ लका प्राचार्य अनिता जधारीले अन्तर्राष्ट्रिय श्रमिक महिला दिवसको महत्वबारे स्पष्ट पार्दै महिला दिवसलाई समाजवादी आन्दोलनको रूपमा विकास गर्नु जरूरी भएको बताउनुभयो ।
कार्यक्रममा ख्वप मा.वि.का प्राचार्य लक्ष्मीप्रसाद कर्माचार्य र बीए तथा एमए अङ्ग्रेजी इन्चार्ज कमिनिका न्याइच्याईले पनि बोल्नुभएको थियो ।