सैनामैनाको रामनगर सहकारीद्वारा वृहत् रक्तदान, ५१ युनिट रगत सङ्कलन

समाचार

गृहपृष्ठ
समाचार
सैनामैनाको रामनगर सहकारीद्वारा वृहत् रक्तदान, ५१ युनिट रगत सङ्कलन

सैनामैनाको रामनगर सहकारीद्वारा वृहत् रक्तदान, ५१ युनिट रगत सङ्कलन

बिहीबार, असोज २२, २०८३ कञ्चन खवर

२२ असोज, कञ्चन
रुपन्देहीको सैनामैना नगरपालिका–४ स्थित रामनगर सहकारी संस्था लिमिटेडले आफ्नो स्वर्ण जयन्तीका अवसरमा आयोजना गरेको साप्ताहिक कार्यक्रमअन्तर्गत वृहत् रक्तदान कार्यक्रम सम्पन्न गरेको छ। कार्यक्रममा ५१ युनिट रगत सङ्कलन भएको छ।
कार्यक्रमको उद्घाटन गर्दै प्रमुख अतिथि तथा सैनामैना नगरपालिकाका नगर प्रमुख फणिन्द्रप्रसाद शर्माले रक्तदानलाई सबैभन्दा ठूलो मानवीय सेवाका रूपमा लिनुपर्ने बताउनुभयो। उहाँले आफूले दान गरेको एक पोका रगतले कसैको अमूल्य जीवन बचाउन सक्ने भन्दै सहकारी संस्थाहरू आर्थिक कारोबारमा मात्र सीमित नभई सामाजिक तथा मानवीय सेवामा समेत सक्रिय हुनुपर्ने धारणा व्यक्त गर्नुभयो।
संस्थाका निवर्तमान अध्यक्ष प्रेमबहादुर खड्काले रामनगर सहकारीले स्थापनाकालदेखि नै सामाजिक उत्तरदायित्वलाई प्राथमिकतामा राख्दै आएको बताउनुभयो। समुदायको सुख–दुःखमा साथ दिनु सहकारीको मूल धर्म भएको उल्लेख गर्दै उहाँले यस्ता रचनात्मक तथा मानवीय सेवाका कार्यक्रमले सहकारी र शेयर सदस्यबीचको सम्बन्ध थप प्रगाढ बनाउने बताउनुभयो।
नेपाल रेडक्रस सोसाइटी पर्रोहा उपशाखाकी अध्यक्ष मिना भण्डारीले पछिल्लो समय देखिएको रगतको अभाव न्यूनीकरण गर्न रक्तदान कार्यक्रमले महत्वपूर्ण योगदान पुर्‍याउने बताउनुभयो। अस्पतालहरूमा रगतको माग उच्च रहेको अवस्थामा सहकारीले आयोजना गरेको रक्तदान कार्यक्रमले बिरामीका लागि ठूलो सहयोग पुग्ने भन्दै उहाँले रक्तदाताप्रति धन्यवाद व्यक्त गर्नुभयो।
संस्थाका उपाध्यक्ष तथा कार्यक्रम संयोजक हरिप्रसाद शर्मा गौतमले कार्यक्रमको उद्देश्यबारे प्रकाश पार्दै स्वागत मन्तव्य व्यक्त गर्नुभएको थियो। उहाँले स्वर्ण जयन्तीअन्तर्गत आयोजना गरिएको साताव्यापी कार्यक्रमको रूपरेखाबारे जानकारी गराउँदै पहिलो दिन सभाभवन परिसरमा सरसफाइ कार्यक्रम सम्पन्न गरिएको र दोस्रो दिन वृहत् रक्तदान कार्यक्रम आयोजना गरिएको बताउनुभयो।
कार्यक्रमका अध्यक्ष तथा संस्थाका अध्यक्ष दिपेश्वर पौडेलले रक्तदानको महत्त्वबारे प्रकाश पार्दै संस्थाले सामाजिक उत्तरदायित्वअन्तर्गत आगामी दिनमा पनि मानवीय तथा सेवामूलक कार्यक्रमलाई निरन्तरता दिने प्रतिबद्धता व्यक्त गर्नुभयो।
उहाँले रक्तदान कार्यक्रममा सहभागी भई कार्यक्रम सफल बनाउन सहयोग गर्ने सम्पूर्ण रक्तदाता, अतिथि, नेपाल रेडक्रस सोसाइटी, शेयर सदस्य तथा सहयोगीप्रति आभार व्यक्त गर्नुभयो।
रामनगर सहकारी संस्था लिमिटेडले आफ्नो स्वर्ण जयन्तीको अवसरमा विभिन्न सामाजिक तथा रचनात्मक कार्यक्रम आयोजना गर्दै आएको जनाएको छ।

प्रकाशित मिति: बिहीबार, असोज २२, २०८३ १८:४९