दुर्गम बस्तीहरुमा इन्टरनेट विस्तार

समाचार

गृहपृष्ठ
समाचार
दुर्गम बस्तीहरुमा इन्टरनेट विस्तार

दुर्गम बस्तीहरुमा इन्टरनेट विस्तार

सोमबार, भदौ १, २०८३ कञ्चन खवर

१ भदौ, बागलुङ्ग/सुरेश छन्त्याल
बागलुङ जिल्लाको अति दुर्गम मानिने पाण्डबखानी, रमुवा र रणसिंह जस्ता क्षेत्रमा इन्टरनेट सेवा पुग्नु केवल प्रविधिको विकास मात्र नभई यहाँका बासिन्दाका लागि एउटा भाग्य र ठूलो अवसर साबित भएको छ। प्रविधिको यो गतिसँगै गाउँवस्तीहरू पनि अब डिजिटल युगसँग जोडिन थालेका छन्।
भायनेट इन्टरनेट कम्पनीका तर्फबाट गलकोट नगरपालिका–१० पाण्डबखानी निवासी रेशम बुढाको अथक प्रयास, व्यक्तिगत मेहनत र लगानीका कारण यो सेवाले फड्को मारेको छ।
हालसम्म बडिगाड गाउँपालिकाको नेताखर्क भेडिखोर र फर्सासम्म इन्टरनेट सेवा विस्तार भइसकेको छ, भने आगामी दिनमा यसलाई अझै विस्तार गरी ‘पुरानो गाउँ’ सम्म पुर्‍याउने योजना रहेको बुढाले जानकारी दिनुभएको छ।
भौगोलिक बिकटता र प्रतिकूल मौसमलाई चिर्दै सेवा पुर्‍याउनु चानचुने कुरा थिएन। यस्तो वर्षायामको निरन्तर झरी र प्रतिकूल मौसमसँग जुध्‍दै वाइफाइ जडान कार्यलाई निरन्तरता दिनु केवल व्यावसायिक धर्म मात्र नभई स्थानीय जनसमुदायलाई सेवा प्रदान गर्ने र प्रविधिमैत्री बनाउने ठूलो अभियान बनेको छ।
यस कम्पनीको मुख्य कार्यालय काठमाडौंमा रहेको छ। भने बागलुङ्ग, गलकोट र पाण्डबखानीमा शाखा कार्यालयहरू सञ्चालनमा रहेका छन्। पाण्डबखानी शाखाका सञ्चालक दीप घर्तीका अनुसार बागलुङ्ग शाखा प्रमुख डम्बरबहादुर केसीसँगको सहकार्यमा २०६६ साल मा (सुरुवातको चरण) मा पाण्डबखानीका जम्मा २० घरधुरीबाट सेवाको थालनी गरिएको थियो। हाल भने यस क्षेत्रको दायरा फराकिलो बन्दै गएको छ। अहिले पाण्डबखानी र रमुवा क्षेत्रमा मात्रै करिब साढे चार सय घरमा वाइफाइ जडान भइसकेको सञ्चालक घर्तिले बताएका छन्। दुर्गम गाउँहरूमा इन्टरनेट सेवाको सहज उपलब्धतासँगै यहाँका विद्यार्थी, युवा तथा स्थानीय बासिन्दाहरू शिक्षा, सूचना र प्रविधिसँग जोडिन पाउँदा हर्षित छन्। स्थानीय स्तरमा नै प्रविधिको यो पहुँच पुर्‍याउन अरात्र खटिने सञ्चालक तथा प्रतिनिधिहरूको यो मेहनतले गाउँ र सहरबीचको डिजिटल दूरीलाई तीव्र गतिमा घटाउँदै लगिरहेको छ।
यसैबीच गलकोट नगरपालिका १० का वडा अध्यक्ष भक्तबहादुर काउचाले भन्नुभयो दुर्गम भूगोलमा इन्टरनेट सेवाको पहुँच पुग्नु हाम्रो वडाका लागि ऐतिहासिक र गौरवको कुरा हो। यसले प्रशासनिक काम, सूचना आदान(प्रदान र समग्र वडाको विकासमा महत्त्वपूर्ण टेवा पुर्‍याएको बताउनु भयो ।
स्थानीय समाजसेवी गंगाबहादुर घर्ती पुनले पनि आफ्नो विचार व्यक्त गरेका छन उनले भने गाउँका युवा तथा बासिन्दाहरूलाई बाहिरी दुनियाँसँग जोड्न प्रविधिको ठूलो हात हुन्छ। यो मेहनत र लगानीले दुर्गमका बस्तीहरूलाई पनि सहरसँग जोडिदिएको छ, जुन प्रशंसनीय रहेको बताउनु भयो। त्यसैगरी एक शिक्षिकाले आफ्नो धारणा राख्दै विद्यार्थीहरूलाई पठनपाठन र प्रविधिमैत्री शिक्षाका लागि इन्टरनेट अनिवार्य जस्तै भइसकेको छ। गाउँमै वाइफाइ सुविधा उपलब्ध भएपछि बालबालिकाको अध्ययनमा धेरै सहजता आएको छ, जसले शैक्षिक गुणस्तर सुधारमा ठूलो सहयोग पुग्ने गरेको बताइन् ।

प्रकाशित मिति: सोमबार, भदौ १, २०८३ १७:३३

प्रतिक्रिया दिनुहोस्